Kjernemodellen

Brukarinnsikt

For å bruke kjernemodellen rett må du ha god innsikt i brukarane og behova deira.

Kort oppsummert

  • Alle som skal bruke tenesta di, er ekte menneske som lever sine eigne liv med kvar sine håp, draumar og behov.
  • For å kunne sjå tenesta di frå perspektivet til brukaren er du avhengig av å skaffe deg reell innsikt i kven brukarane er.
  • Det lurast du kan gjere for å skaffe deg denne innsikta, er å snakke med brukarane.

Eksempel

Brukarinnsikt for Naturvernforbundet

Då Naturvernforbundet jobba med redesign av nettsidene sine, gjennomførte dei ein enkel prosess for å skaffe seg brukarinnsikt.

Brukarbehov og brukaroppgåver

Først gjekk dei gjennom webstatistikken og søkeloggen og samla det dei hadde av anna brukarinnsikt, i form av spørjeundersøkingar, tilbakemeldingar på Facebook og så vidare.

Dei gjorde også ei rekke brukarintervju, både med interne og eksterne brukarar, for å fylle ut biletet.

Toppoppgåveundersøking

Dei gjorde ei enkel toppoppgåveundersøking for å kartlegge dei viktigaste brukaroppgåvene. Det overveldande inntrykket var at folk først og fremst var ute etter enkel faktainformasjon.

I toppoppgåveundersøkinga såg dei at om lag halvparten av brukarane kom til nettstaden for å finne faktainformasjon om eit konkret tema eller ei enkeltsak, for eksempel vindkraft, ulv, plast eller Førdefjorden.

Denne toppoppgåva gjekk igjen på tvers av dei fleste brukargruppene, anten det var medlemmer, skuleelevar eller generelt naturverninteresserte.

Det ligg dermed an til at faktainformasjon om tema eller enkeltsak kan vere viktige kjernar for mange målgrupper.

Slik gjer du det

  • Snakk med brukarane dine så ofte du kan.
  • Bruk dei innsiktsmetodane du har tid og høve til å gjennomføre.
  • Jo fleire som er involverte i innsiktsaktivitetane, jo betre.

Gode spørsmål

  • Kven er brukarane av tenesta di?
  • Kva grunnleggande behov har dei?
  • Kva utfordringar og problem har dei?
  • Kva er det som motiverer dei?
  • Kva er det aller viktigaste for dei?

Gode metodar for brukarinnsikt

Brukartesting

Ein brukartest er ei simulering av at ekte brukarar gjer ekte oppgåver i ein ekte kontekst. Dette er den beste metoden for å sjekke om det du lagar, faktisk vil fungere i røynda. Testen gir deg i tillegg innsikt i brukarbehova og gode idear til vidareutvikling. Halve verdien av ein brukartest er å vere med og observere, så jo fleire observatørar, jo betre.

Du bør alltid brukarteste den eksisterande løysinga før eit redesign. Er det ei heilt ny løysing, kan du brukarteste konkurrentar og andre samanliknbare løysingar. Du bør også brukarteste skisser, prototypar og tekstar undervegs i utviklingsprosessen.

Kobling til kjernemodellen

  • Brukartesting gir deg innsikt i brukarbehov og kan avdekke brukaroppgåver og spørsmål.
  • Det er også ein god måte å finne ut om kjerneinnhaldet løyser brukaroppgåvene.

Tilrådd ressurs: Eli Toftøy-Andersen og Jon Gunnar Wold: Praktisk brukertesting, 2. utgåve (Cappelen Damm, 2021).

Djupintervju

Djupintervju er den beste innsiktsmetoden for å bli kjend med brukarane og behova deira. Metoden går ut på å avdekke brukarbehov ved å snakke med representative brukarar. Lag ein intervjuguide og bruk han til å grave i motivasjonen, behova og dei mentale modellane til brukarane. Når du stiller utdjupande spørsmål og er oppriktig nysgjerrig, får du unik innsikt, gode idear og ei empatisk forståing av brukarane.

Kobling til kjernemodellen

  • Du bør gjennomføre brukarintervju jamleg for å få innsikt i brukarar og brukarbehov. Det hjelper deg å velje dei rette kjernane å jobbe med og gir deg grunnleggande kunnskap om brukarbehova.
  • Djupintervjua gir deg også innsikt i brukaroppgåvene og dei relaterte spørsmåla du må svare på gjennom kjerneinnhaldet.

Tilrådd ressurs: Steve Portigal: Interviewing Users (Rosenfeld Media, 2019).

Jobs to be done

Jobs to be done (JTBD) er eit teoretisk rammeverk med litt ulike tilnærmingar, men grunnleggande handlar det om å identifisere «jobbane» til kundane eller brukarane. Ein jobb er i denne samanhengen eit bakanforliggande brukarbehov som kunden «leiger» eit produkt eller ei teneste for å løyse.

Desse jobbane kan løysast på ulike måtar, og JTBD-tilnærminga handlar om å utvikle og tilpasse produkt og tenester slik at dei løyser jobbane til kundane betre. Ein jobb kan ha fleire nivå. For eksempel kan eit grunnleggande behov (gjerne kalla aspiration eller big jobs i JTBD) komme til uttrykk gjennom konkrete brukaroppgåver (gjerne kalla little jobs eller micro jobs).

Koblingar til kjernemodellen

  • Brukaroppgåvene du jobbar med i kjernemodellen, er som regel jobbar på eit lågare nivå (little jobs / micro jobs).
  • JTBD kan også vere eit godt rammeverk for å jobbe med strategi, brukarbehov og prioritering av kjernar i forarbeidet til ein kjerneverkstad.

Tilrådd ressurs: Jim Kalbach: The Jobs To Be Done Playbook (Two Waves, 2020).

Kundereise

Ei kundereise (også kalla brukarreise) er ei visuell framstilling av korleis ein kunde eller brukar tenker og handlar i ulike delar av for eksempel ein kjøpsprosess. Ved å lage ei kundereise kan du få oversikt over heile prosessen og sjå kvar brukaren støyter på problem, og kvar det er moglegheiter for forbetring.

Stadene der kunden er i kontakt med verksemda, blir gjerne kalla kontaktpunkt og kan vere for eksempel nettsidene, appen eller ein telefonsamtale. Tanken er å gripe tak i problema og fikse dei, men utfordringa er ofte at kundereisa blir hengande på veggen eller liggande i ein krok på kontoret etter at kartlegginga er ferdig.

Kobling til kjernemodellen

  • Kjernemodellen er ein praktisk måte å «ta kundereisa ned på jorda» på, ved å designe for eitt og eitt kontaktpunkt – eller éin og éin kjerne, om du vil.
  • Du kan også jobbe med éin og éin fase i kundereisa.
  • Koblar du kjernane dine gjennom Vegar inn og Vegar vidare, kan du over tid byggje ei større kundereise. Sjå også Kjerneflyt.

Tilrådde ressursar: Adeline Hvidsten, Ranvir Rai, Stephanie Helland og Theodor Henriksen: Introduksjon til tjenestedesign (Cappelen Damm undervisning, 2021). Jim Kalbach: Mapping Experiences (2nd edition) (O’Reilly, 2021).

Kundeservice – logging og medlytt

Kundeservice er ei ofte undervurdert kjelde til innsikt i brukarane.

  • Logging og kategorisering av kundehenvendingar gir ein god indikasjon på kva som er dei største problema kundane slit med.
  • Medlytt på kundeservice, altså at du set deg ned ein heil eller halv dag og lyttar på kva kundane spør om og kva kundeservice svarer, er ein god måte å få innsikt i brukarbehov på.

Kobling til kjernemodellen

  • Både medlytt og kundeserviceloggar er gode indikasjonar på kva som er toppoppgåvene til brukarane.
  • Medlytt gir deg også gode innspel til korleis du kan utforme kjerneinnhald.
Personaer og scenario

Personaer er ein metode som går ut på å utvikle representative brukarprofilar basert på brukarinnsikt. Dei kan fungere som eit felles referansepunkt for ei arbeidsgruppe, slik at gruppa har eit empatisk bilete av brukarane ho jobbar for. Ein persona kan også ha ulike tilknytte scenario for bruk av tenesta.

Kobling til kjernemodellen

  • Du kan utvikle personaer som ein del av forarbeidet til ein kjerneverkstad og tildele ein persona til kvart kjernepar.
  • Viss fleire kjernepar jobbar med same kjerne med ulike personaer, får du eit meir komplett bilete av kva behov kjerneinnhaldet må dekke.
  • Du kan også lage eit scenario med typiske brukaroppgåver for ein persona.

Tilrådde ressursar: Alan Cooper: The Inmates Are Running the Asylum (Sams Publishing, 2004). Aurora Harley (Nielsen Norman Group): Personas Make Users Memorable for Product Team Members.

Toppoppgåver og gjennomføringsgrad

Toppoppgåvetilnærminga går ut på å identifisere toppoppgåvene og løyse dei så godt som mogleg, samtidig som du systematisk slettar mikrooppgåvene.

Kobling til kjernemodellen

  • Toppoppgåvene er den beste måten å identifisere kva som er dei viktigaste kjernane i tenesta di.
  • Mikrooppgåvene fortel deg kva delar av tenesta di som stel ressursar og øydelegg for toppoppgåvene. Desse kan med fordel slettast.
  • Du kan også måle gjennomføringsgraden for toppoppgåvene.

Les meir under Toppoppgåver.

Tilrådd ressurs

Nyheitsbrev

Få fagstoff om kjernemodellen og kvardagsinnovasjon med KI

Nye malar, eksempel frå kjerneverkstader og praktiske KI-grep, rett i innboksen. Vil du heller lese boka? Første kapittel er gratis.

Fagstoff om kjernemodellen og kvardagsinnovasjon med KI, nokre gonger i månaden. Du kan melde deg av når du vil.

Are Halland Kontakt

Snakk med Are

Lurer du på korleis de kan bruke kjernemodellen, eller treng de hjelp med ein kjerneverkstad? Ta ein uforpliktande kaffiprat.