Kort oppsummert
- Brukaroppgåvene er det brukaren kjem til løysinga di for å gjere. Det er problema dei vil løyse, handlingane dei vil utføre og spørsmåla dei vil ha svar på.
- Start med å fylle ut dei viktigaste brukaroppgåvene for temaet du jobbar med, og finn spørsmåla som høyrer til.
- Brukaroppgåvene skal vere baserte på reell brukarinnsikt.
Eksempel på brukaroppgåver
For ein nettbutikk kan brukaroppgåvene vere å vurdere kvaliteten på eit produkt, samanlikne det med produkta til konkurrentane, og eventuelt kjøpe viss det kjennest rett. Etter kjøpet kan det vere å returnere produktet viss det var feil, eller å få det reparert viss det har gått i stykke.
For kommunale tenester er ei typisk oppgåve å finne opningstidene for det lokale biblioteket, symjebassenget eller renovasjonsanlegget. Det kan også vere å finne fram, sjekke prisar og finne ut når det eventuelt er kø.
Brukaroppgåver for bilforsikring
Nokre typiske brukaroppgåver og spørsmål knytte til bilforsikring:
- Samanlikne prisar og vilkår
- Kva kostar det?
- Kva får eg?
- Får eg leigebil med ein gong?
- Kjøpe bilforsikring
- Kva type forsikring skal eg velje?
- Bør eg betale årleg eller månadleg?
- Kontakte kundeservice
- Kva betyr vilkåra?
- Treng eg Premium?
- Er tilhengar dekt? Kva med campingvogn?
Slik gjer du det
- Ta utgangspunkt i det du har av kvalitativ og kvantitativ brukarinnsikt.
- Skriv ned dei viktigaste brukaroppgåvene for kjernen du jobbar med, i prioritert rekkefølge.
- Finn dei viktigaste spørsmåla som er knytte til kvar oppgåve.
- Set deg inn i ståstaden til brukaren, bruk sunt vit, og prøv å stille dei same spørsmåla som han eller ho ville gjort.
Gode spørsmål
- Kva kjem brukarane for å gjere?
- Kva spørsmål vil dei ha svar på?
- Kva er dei viktigaste spørsmåla?
- Kva oppgåver er det få – eller ingen – som spør etter?
- Blir oppgåvene påverka av situasjonen brukarane er i?
- Kva ville du sjølv lurt på i ein tilsvarande situasjon?
- Er det du kjem fram til, basert på brukarinnsikt, eller er det gjetting og ønsketenking?