Kjernemodellen

Toppoppgåver

Toppoppgåvene til brukarane er den viktigaste nøkkelen du har til å prioritere.

Top tasks are the small set of tasks that matter most to your customers. Make these tasks work well, and you’ll be on the right track. Get them wrong, and chances are you’ll lose the customer.

Gerry McGovern

Du kan ikkje løyse alle brukaroppgåvene for alle brukarane. Skal du begynne ein stad, bør du derfor starte med dei viktigaste oppgåvene – toppoppgåvene.

Toppoppgåvene er dei relativt få oppgåvene som er aller viktigast for dei aller fleste av brukarane dine.

Finn toppoppgåvene

Viss du tek ein titt på webstatistikken din, søkeorda til brukarane dine eller loggen over førespurnader til kundeservice, finn du som regel eit mønster som liknar ganske mykje på dette:

Graf med ein lang hale. Nokre få toppoppgåver til venstre står for ein stor del av etterspurnaden, medan svært mange mikrooppgåver til høgre står for resten.

Nokre få brukaroppgåver står for ein uforholdsmessig stor del av sidetreff, søkeord eller førespurnader til kundeservice.

Tilsvarande er det veldig mange oppgåver som berre nokre få er opptekne av – mikrooppgåvene.

Eit typisk mønster er at dei 3–5 viktigaste toppoppgåvene står for rundt 25 % av etterspurnaden. Skal du starte ein stad, bør du starte med desse.

Mikrooppgåver

Tilsvarande som for toppoppgåvene finst det veldig mange oppgåver som berre nokre få – eller ofte ingen – er opptekne av. Dette er mikrooppgåvene.

Dessverre bruker mange organisasjonar like mykje ressursar – og ofte meir – på å løyse mikrooppgåvene som på å løyse toppoppgåvene.

For eksempel hadde Microsoft.com på eit tidspunkt 10 millionar nettsider. Berre 3 millionar av desse sidene hadde nokon gong blitt sett av andre enn den som laga dei. Dei 7 millionar sidene som ingen trong, førte til overfylte menyar og søkeresultat, slik at det blei vanskelegare for brukarane å få løyst toppoppgåvene.

Du bør derfor overvake mikrooppgåvene, slik at du kan jobbe med å slette unyttig innhald.

Viktige mikrooppgåver

Nokre mikrooppgåver kan vere viktige for nokre få brukarar. For eksempel kan ei lita brukargruppe i NAV ha eit heilt spesielt behov som er viktig for dei det gjeld.

Ressursbruken på desse oppgåvene må likevel vegast mot toppoppgåvene. Gjeld det berre nokre ytterst få, kan du kanskje heller be dei ringe enn å lage ei omfattande sjølvbeteningsløysing.

Mål gjennomføringsgraden

I tillegg til etterspurnaden etter toppoppgåver bør du også måle gjennomføringsgraden for dei ulike oppgåvene.

Gjennomføringsgraden er delen av brukarane som rapporterer at dei fekk løyst ei gitt brukaroppgåve. Dette er eitt av dei beste måltala du kan ha på om produktet eller tenesta di fungerer eller ikkje.

Har du ei toppoppgåve med låg gjennomføringsgrad, veit du kvar du bør sette inn ressursane.

Slik gjer du det

Det finst fleire innfallsvinklar til å kartlegge toppoppgåvene:

  • Webstatistikk – finn ut kva som er dei mest besøkte sidene.
  • Søkelogganalyse – sjå kva som er dei mest brukte søkeorda.
  • Kundeservicelogg – be kundeservice om å loggføre førespurnader, og sjå kva spørsmål som går igjen oftast.
  • Toppoppgåveundersøking – legg ut eit enkelt skjema på nettsida eller tenesta, og spør folk kva dei kom for å gjere i dag.

Slår du saman desse statistikkane, vil du sjå eit veldig tydeleg mønster: toppoppgåvene dine.

Måle gjennomføringsgrad

  • Legg ut ei popup-undersøking der du spør kvifor brukarane kjem til nettstaden, og lar dei deretter gjennomføre brukaroppgåva.
  • La undersøkinga ligge passivt til dei er ferdige eller gir opp, og la dei registrere om dei fekk gjort det dei kom for, eller ikkje.
  • Typiske verktøy for dette er Task Analytics og Hotjar.

Tilrådde ressursar

Task Analytics

Eit norskutvikla verktøy for å måle etterspurnad og gjennomføringsgrad for toppoppgåver i digitale løysingar.

Nyheitsbrev

Få fagstoff om kjernemodellen og kvardagsinnovasjon med KI

Nye malar, eksempel frå kjerneverkstader og praktiske KI-grep, rett i innboksen. Vil du heller lese boka? Første kapittel er gratis.

Fagstoff om kjernemodellen og kvardagsinnovasjon med KI, nokre gonger i månaden. Du kan melde deg av når du vil.

Are Halland Kontakt

Snakk med Are

Lurer du på korleis de kan bruke kjernemodellen, eller treng de hjelp med ein kjerneverkstad? Ta ein uforpliktande kaffiprat.